Mic 7 | NdeIBE | STEP | Maye ngosizi lwami! Nginjengomuntu obutha izithelo zehlobo ekukhothozweni kwesivini; akukho sixha samavini okudliwa, kayikho lemikhiwa yakuqala engiyikhanukayo.

Micah 7

Usizi Luka-Israyeli

1 Maye ngosizi lwami! Nginjengomuntu obutha izithelo zehlobo ekukhothozweni kwesivini; akukho sixha samavini okudliwa, kayikho lemikhiwa yakuqala engiyikhanukayo.

2 Abamesabayo uNkulunkulu basusiwe elizweni, kakho lamunye umuntu olungileyo oseleyo. Abantu bonke bacathamela ukuchitha igazi; lowo lalowo uzingela umfowabo ngombule.

3 Izandla zombili zizingcitshi ekwenzeni okubi; umbusi ufuna izipho ngamandla, umahluleli wamukela isivalamlomo, abalamandla babiza abakufisayo – bonke baceba okubi bendawonye.

4 Ongcono wabo unjengesihlahla sameva, oqotho kakhulu mubi kulothango lwameva. Usuku lwabalindi benu selufikile, usuku uNkulunkulu alethekela ngalo. Manje sekuyisikhathi sokuphumputheka kwabo.

5 Ungamethembi umakhelwane; ungagwabi ngomngane wakho. Lalowo olala umgonile, qaphela amazwi akho.

6 Ngoba indodana idumaza uyise, indodakazi ivukela unina, umalukazana avukele uninazala – izitha zomuntu ngamalunga endlu yakhe.

7 Kodwa mina ngilindele uJehova ngethemba, ngilindele uNkulunkulu uMsindisi wami; uNkulunkulu wami uzangizwa.

U-Israyeli uzavuka

8 Ungaklolodi wena sitha sami! Lanxa ngiwile, ngizavuka. Lanxa ngihlezi emnyameni, uJehova uzakuba yikukhanya kwami.

9 Ngenxa yokuba ngonile kuye, ngizalumela ulaka lukaJehova, aze angincengele endabeni yami, aveze ukungabi lacala kwami. Uzangikhuphela phandle ekukhanyeni; ngizabona ukulunga kwakhe.

10 Lapho-ke isitha sami sizakubona, njalo sibanjwe zinhloni, lowo owathi kimi, “Ungaphi uJehova, uNkulunkulu wakho?” Lakhathesi uzagxotshwa ngezinyawo njengodaka emigwaqweni.

11 Usuku lokwakhiwa kwemiduli yakho luzafika, usuku lokuqhelisa imingcele yakho.

12 Ngalolosuku abantu bazakuza kuwe bevela e-Asiriya lasemadolobheni aseGibhithe, njalo kusukela eGibhithe kusiya kuYufrathe, kusukela olwandle kusiya olwandle, lakusukela entabeni kusiya entabeni.

13 Umhlaba uzachitheka ngenxa yabahlezi kuwo, ngenxa yezenzo zabo.

Ukukhuleka Lokudumisa

14 Beluse abantu bakho ngentonga yakho, umhlambi welifa lakho, ohlala wodwa ehlathini emadlelweni avundileyo. Kawudle eBhashani laseGileyadi njengasezinsukwini zokuphuma.

15 “Njengasezinsukwini zokuphuma kwenu eGibhithe, ngizabatshengisa izimangaliso zami.”

16 Izizwe zizabona ziyangeke, zemukwe wonke amandla azo. Zizabamba imilomo yazo ngezandla, lezindlebe zazo zingabe zisezwa.

17 Zizakhotha uthuli njengenyoka, njengezinanakazana ezihuquzela emhlabathini. Zizakuza ziqhaqhazela ziphuma emihomeni yazo; zizaphendukela kuJehova uNkulunkulu wethu ngokwesaba, njalo lawe zizakwesaba.

18 Ngubani onguNkulunkulu njengawe, oxolela izono athethelele iziphambeko zensalela zelifa lakhe na? Kawuthukutheli kokuphela kodwa uthokoza ngokutshengisa isihawu.

19 Uzakuba lesihawu kithi futhi; uzanyathela izono zethu ngezinyawo uphosele bonke ububi bethu ezinzikini zolwandle.

20 Uzakuba qotho kuJakhobe, ubonakalise isihawu sakho ku-Abhrahama, njengokuthembisa kwakho ngesifungo kubokhokho bethu ezinsukwini zasendulo.